په سرحدي او ډېورنډ فرضي کرښې ته څېرمه ولايتونو کې د لرو پرتو ولسوالیو ولسونو ته د خدمتونو وړاندې کولو په موخه سفر
چهارشنبه ١٤٤٦/٤/٢٧
د سرحدونو، قومونو او قبايلو چارو وزارت د مشرتابه په هدايت د دغه وزارت لخوا د مرکزي کمېټې پلاوي، چې د مالي او اداري لوی رئیس مولوي محمد انور تائب يې مشري کوله، کنړ ولايت ته سفر وکړ او د ياد ولايت له مرستيال والي الحاج مولوي عبدالله حقاني، ولايتي کمېتې غړو او اړوندو مسؤلينو سره يې ناسته ترسره کړه.
د دغې ناستې پر مهال د ډېورنډ فرضي کرښې په اوږدو کې پرتو ولسونو ته د خدمتونو د وړاندې کولو په موخه د ولايتي کمېټې تر سره شوي فعاليتونه روښانه شول او ګزارش يې د سرحدونو، قومونو او قبايلو چارو وزارت له لېږل شوي هيئت سره شريک شو، چې د ياد هيئت له لوري ورته د خدمتونو وړاندې کولو په کړنلاره، ميکانيزم او اسنادو په اړه وضاحت وړاندې شو.
په پاي کې د کنړ ولايت مرستيال والي د ولايتي کمېټې په مشرۍ د سرحدي او ډېورنډ فرضي کرښې ته څېرمه خلکو ته د خدمتونو وړاندې کولو کړنلارې او ميکانيزم روښانه کولو په موخه د ورغلي پلاوي څخه مننه وکړه او دا چاره يې د يادو ولسونو د خدمت لپاره اړينه وبلله.
