د غور ولایت مرغاب ولسوالۍ له سیلاب ځپلو کورنیو څخه لیدنه!
پنج شنبه ۲۴/۲/۱۴۴۶
د سرحدونو، قومونو او قبایلو چارو وزیر الحاج ملا نورالله نوري غور ولایت ته د خپل سفر پرمهال د وروستیو سیلابونو له وجهې د یاد ولایت د مرغاب ولسوالۍ له بې کوره شویو کورنیو څخه لیدنه وکړه. دغه بې ځایه شوي چې شمېر یې ۵۰۰ کورنو ته رسېږي د اخیري اورښتونو په نتیجه کې راوتلو سېلونو یې کورونه ویجاړ کړي او د ښار په یوه مؤقتي کمپ کې استوګن دي.
دوی له ښاغلي نوري څخه د دغې لیدنې په ترڅ کې وغوښتل چې له دوی سره دي د استوګنځایونو ترڅنګ هر اړخیزه همکاري وشي، ځکه چې سیلابونو یې هرڅه ورڅخه وړي دي او له ګڼو ستونزو سره لاس او ګرېوان دي.
ښاغلي نوري د دغې کتنې پرمهال ټولو بې کوره شویو کورنیو ته ډاډ ورکړ چې د اسلامي امارت مسؤلین تاسې هیڅکله نه هېروي او د دایمي سرپناوو جوړولو په برخه کې به جدي اقدامات ترسره کړي. نوموړي د دوی ستونزي اړینې وبللې زیاته یې کړه چې ټول مشکلات به یې تر ریاست الوزراء او اړوندو ادارو رسوي او د هر اړخیزو مرستو د جلب په برخه کې به کوټلي ګامونه اخلي.
د یادونې وړ ده، چې څه موده وړاندې د ریاست الوزراء اقتصادي مرستیال الحاج ملا عبدالغني برادر اخوند هم دغې سیمې ته سفر کړی و، چې په ترڅ کې یې د بې ځایه شویو کورنیو لپاره د (۲۰۰) کورونو جوړولو کارونه پیل کړي وو، چې د جوړولو چارې یې په چټکۍ سره روانې دي.
