د خپلمنځي شخړو د حل په برخه کې د ولسي مشرانو د همکارۍ ډاډ!
دوشنبه ـ ۲۴/۱۲/۱۴۴۵
د کندوز ولایت د سرحدونو او قبایلو چارو ریاست او سیمه ییزو مشرانو د دوو کورنیو تر منځ د پېښې شوې بدي د حل په غونډه کې د شخړو حل خپل مسؤلیت بللی او له حکومت سره یې د بدیو د هواري په برخه کې د همکارۍ ډاډ څرګند کړی.
یاده غونډه تېره ورځ د کندز مرکز ته څېرمه د آهنګري په کلي کې دایره شوې وه، چې پر مهال یې د طرفینو تر منځ دوه کاله مخکې پېښه شوې بدي چې له امله یې یو تن وژل شوی او ځینې مالي زیانونه اوښتي و، د یاد ریاست د مسؤلینو او مصلحینو په ګډه همکارۍ حل و فصل شوه.
د دغې ناستې په اوږدو کې قومي سپین ږیرو او دیني عالمانو ویناوې وکړې، د غچ اخیستنې پر ځای یې په بښنه، اتحاد او ورورولۍ ټینګار وکړ او ښکېلې خواوې یې صلحې ته راوبللې. په بدي کې ښکېلو خواوو د ولسي مشرانو او مسؤلینو له ستړیاوو مننه وکړه او له یو بل سره په خوښي د ژوند تېرولو اطمینان یې وړاندې کړ.
