له اړیکو دفتر مؤسیسې سره د ګډ کار کولو هوکړه وشوه
۱۴/۹/۱۴۴۵ هـ ل
د سرحدونو، قومونو او قبایلو چارو وزارت اړوند د جرګو او قبایلو چارو د همغږۍ مرستیال مولوي محمد علي جان احمد د اقتصاد وزارت له لوري وزارت ته د را پېژندل شوې (د اړیکو دفتر مؤسیسې) له مشر انجنیر عبدالرحیم خُرم او راغلي هیئت سره د دوه اړخیزو همکاریو هوکړه لیک لاسلیک کړ، چې پرمهال یې د وزارت د پلان او پالیسي رئیس مولوي نیک محمد افغاني، د ښوونې او روزنې رئیس مولوي عبدالرحمن رحماني، د معلوماتي تکنالوژي رئیس قاري عبد المتین رحیمزي، د وزارت ځینو کارکوونکو او د اړیکو مؤسیسې راغلي پلاوي هم ګډون کړی وو.
د ناستې پرمهال د یادې مؤسیسې مشر ښاغلي خُرم د یاد وزارت، قومي مشرانو او دیني عالمانو په مرسته د جرګو او مرکو له لارې د ولسي شخړو د حل او په پنځو ولایاتو کې د ځینو پروژو د عملي کولو ژمنه وکړه او له دغه وزارت سره یې د یو ځای کار کولو هوکړه وکړه.
په پای کې د جرګو او قبایلو چارو د همغږۍ معین ښاغلي احمد د دغې مؤسیسې له اقدام څخه قدرداني وکړ ویې ویل: دا ډېر کړېدلی ولس دی، څوک چې په اخلاص سره د دې ولس د هوساینې لپاره کار کوي، موږ یې ستایو او په چارو کې اوږه په اوږه ورسره ولاړ یو.
