د پکتیکا ولایت ارګون ولسوالۍ له قومي مشرانو سره ناسته
۱۴۴۵/۸/۱۹
د سرحدونو، قومونو او قبایلو چارو وزارت سرپرست الحاج ملا نورالله نوري د پکتیکا ولایت ارګون ولسوالۍ له قومي مشرانو سره وکتل.
د لیدنې پر مهال د ولسي استازو په مشرۍ څو تنو خبرې وکړې، پکتیکا ولایت یې یو سرحدي او له خدمتونه محروم ولایت یاد کړ. دوی له سرپرست وزیر څخه د کلینیکونو، روغتونو او تعلیمي مرکزونو د جوړولو او د یاد ولایت د ارګون او سروبي ولسوالیو ترمنځ د زامې بند رغولو په اړه د حکومت د همکارۍ غوښتنه وکړه.
ورپسې د سرحدونو، قومونو او قبایلو چارو سرپرست وزیر ښاغلي نوري د ولس استازو ته تر هرکلي وروسته وویل: پوښتنه او د مشکلاتو اورېدل مو زموږ مسؤلیت دی. نوموړي زیاته کړه: دا د شکر ځای دی چې اوس په ناستو کې د آبادۍ خبرې کېږي، موږ او تاسې ټول د هیواد د ښېرازۍ په لټه کې یو او په ټول هیواد کې د ویجاړي ډبره د چا په لاس کې نشته.
هغه قومي مشرانو ته ډاډ ورکړ چې ستونزې به یې په لیکلې بڼه د ریاست الوزراء تر مقامه رسوي او د حل لارو په برخه کې به یې هڅې کوي.
