د سرحدي تخطیو د کشف او تنظیم نوي رئیس په دنده پیل وکړ
۲۹/۴/۱۴۴۵
د سرحدونو، قومونو او قبایلو چارو وزارت د سرحدونو د بررسي معینیت اړوند د سرحدي تخطیو د کشف او تنظیم نوي ټاکل شوي رئیس مولوي حضرت محمد وحدت خپلو کارکوونکو ته ور وپېژندل شو. په دغه مراسمو کې د یاد وزارت د دفتر رئیس مولوي نیاز محمد تقي، د بشري سرچینو رئیس مولوي کریم شاه تیلوي، د سرحدي څېړنو رئیس مولوي غلام صدیق سباوون او نورو کارکوونکو حضور درلود.
په پیل کې د دفتر رئیس ښاغلي تقي تغیر او تبدیل د اداراتو یو اصل یاد کړ، د پخواني رئیس له ستړیاوو او کارونو څخه یې مننه وکړه او نوي رئیس ته یې په چارو کې د بریا غوښتنه وکړه. نوموړي همدارنګه وویل چې دنده د پیسو لاسته راړولو ذریعه نه بلکې د الله تعالی ج او ټول افغان ملت پر وړاندې یو لوی مسؤلیت دی.
ورپسې د بشري زیرمو رئیس ښاغلي تیلوي د نوي ټاکل شوي رئیس په اړه د رئیس الوزراء حکم په لوړ غږ ګډونوالو ته واوراوه او ښاغلي وحدت ته یې په ورسپارل شوي مسؤلیت کې د توفیق غوښتنه وکړه.
په پای کې نوي ټاکل شوي رئیس ښاغلي وحدت په خپلو خبرو کې وویل: زموږ قربانۍ د دې هیواد د خپلواکي، له خپلو خلکو څخه دفاع او د اسلامي نظام قائمول و چې الحمدلله خدای ج مو همدا موخه پوره کړه. هغه له مسؤلینو څخه مننه وکړه چې نوموړي ته یې د خدمت فرصت ورکړ.
