په کندز ولایت کې را منځته شوې شخړه حل شوه
د کندز ولایت امام صاحب ولسوالۍ قیام تمشق په سېمه کې د دوو قومونو ترمنځ پېښه شوې شخړه د یاد ولایت د سرحدونو، قومونو او قبایلو چارو ریاست په همغږۍ، د ولایت مقام او نورو اداراتو په همکاري حل شوه.
د دغې شخړې د حل په موخه د یاد ولایت د سرحدونو، قومونو او قبایلو چارو رئیس مولوي احسان الله ثاقب د نورو اداراتو د مسؤلینو په ملتیا یادې ولسوالۍ ته له سفر کولو سره سم د تمشق سیمې له قومي مشرانو سره د یوې غونډې په ترڅ کې وکتل.
په پیل کې د یاد ریاست رئیس ښاغلي نثار د افغانانو د دودیزو مرکو او جرګو ستاینه وکړه او زیاته یې کړه: دا د افغانانو یو کلتور دی چې د دوو وروڼو تر منځ اختلاف راځي درېیم یې تر منځ د حل کوښښ کوي او د همدې قومي تړونونو په برکت د افغانانو یووالی خوندي دی. یاد پلاوي له سلا و مشورو وروسته د موضوع حل وړاندې کړ او د شخړې ښکېلو لوریو ته یې قناعت ورکړ.
په پای کې د مشرانو په استازولي څو تنو خبرې وکړې د ولایتې اداراتو او د یاد ریاست هڅې یې وستایلې او ورغلي پلاوي ته یې د نورو قومونو د یووالي په اړه ډاډ ورکړ.
