د ځایي او کوچي قومونو تر منځ د شخړو د هواري هڅې
۳۰/ذالقعدةالحرام/۱۴۴۴
د خوست ولایت د ځایي قومونو او کوچیانو تر منځ د رامنځته شوې شخړې د حل په موخه د یاد ولایت د سرحدونو، قومونو او قبایلو چارو ئیس شیخ کلیم الرحمن فاني په مشرۍ، د کرنې او ښار جوړونې ریاستونو له استازو او مل پلاوي څخه جوړ شوي هیئت، د موضوع د حل په تړاو له یادو قومونو سره ناسته وکړه.
دغې ناستې ته د یاد ولایت د سرحدونو، قومونو او قبایلو چارو رئیس ښاغلي فانې د یادې شخړې د حل په موخه د تېرو ناستو په اړه یادو قومونو ته مفصل معلوماتو وړاندې کړل او د شخړې د حل پر لارو چارو یې خبرې وکړې.
ورپسې د ذکر شوي هیئت غړو په خپل وار سره د یادې شوې موضوع په تړاو خپل نظرونه وویل، د راتلونکې روغې جوړې کولو پر اساسي ټکو یې خبرې وکړې او دواړه لورې یې د شخړې هواري ته راوبلل.
د یادونې وړ ده چې د دغې موضوع په اړه د یاد ریاست له لوري مسلسل سفرونه او غونډې جوړې شوې دي او ژر به ورته حل لارې ولټول شي.
