د اسلامي نظام ساتنې ته په ځان او مال سره ولاړ یو
۲۷/ذالقعدةالحرام/۱۴۴۴
د دایکندي والي حاجي عبید، د سرحدونو، قومونو او قبایلو چارو آمر او د نورو ملکي او نظامي اداراتو مسؤلینو د یاد ولایت د پاتو ولسوالۍ ته د قومي مشرانو او دیني عالمانو سره لیدنه وکړه.
د یادې لیدنې په ترڅ کې د پاتو ولسوالۍ په استازولي څو تنو خبرې وکړې او یاد شوي پلاوي ته یې د ښه راغلاست تر څنګ وویل چې دوی د اسلامي امارت ترڅنګ ولاړ دي او په کلکه یې ملاتړ او حمایت کوي، دوی همدارنګه وویل: لکه څنګه مو چې مخکې د اسلامي امارت ملاتړ کړی اوس هم د هیواد د اسلامي نظام ساتنې ته په ځان او مال سره ولاړ یو. د یادې ولسوالۍ خلکو له ورغلي پلاوي څخه د ولسوالۍ د تعمیر لپاره دځای مشخصولو غوښتنه وکړه.
د یاد ولایت والي ښاغلي عبید د ولسونو له ملاتړ او یووالي څخه خوښي وښوده او زیاته یې کړه: د امارت مسؤلین په شپه او ورځ کوښښ کوي ترڅو د خلکو ستونزو ته رسیدګي وکړي او له هرډول تبعیض پرته د ولسونو د مشکلاتو د حل لپاره ورسره ناستې وکړي. نوموړي د ولسوالۍ د تعمیر په اړه وویل چې دوی به له مرکز سره د همغږي کولو وروسته د تعمیر د ځای په اړه ډېر ژر اقدام وکړي.
د دې غونډې ترڅنګ د سرحدونو، قومونو او قبایلو آمر حافظ محب الله سجاد د یادې ولسوالۍ له قومي مشرانو او دینې عالمانو سره وکتل، دوی یې ورورګلوۍ، یووالي او یوبل منلو ته راوبلل او ویې ویل: یادې ولسوالۍ ته زموږ د سفر هدف د دغو قومونوسره همغږي راوستل او د دوی ستونزې اورېدل و. هغه خپلو وظیفوي مسؤلیتونو ته په اشارې سره وویل: د سرحدونو، قومونو او قبایلو چارو وزارت د ملي یووالي د ټينګښت، ملي روغې جوړې، د قومونو ستونزې هوارول او د حکومت او خلکو ترمنځ د اړیکې جوړلو په برخه کې کار کوي.
نوموړي د ټولو قومي مشرانو او علماء کرامو څخه غوښتنه وکړه چې خپلې ستونزې دي له دوی سره شریکې کړي او د هر ډول ستونزو سره د مخامخ کېدلو په وخت کې دي له دوی سره په اړیکه کې شي.
