د سرحدونو قومونو او قبایلو چارو وزارت سرپرست د غزني له والي سره وکتل
د سرحدونو قومونو او قبایلو چارو وزارت سرپرست الحاج ملا نورالله نوري د وزارت د اقتصاد او علفچرونو رئیس مولوي لعل محمد منیب او د مالیې وزارت سرپرست الحاج ملا ناصر اخند د غزني ولایت له والي الحاج حافظ محمد امین عمري سره د دې ولایت د مېلمستون په انګړ کې په داسې حال کې وکتل چې د دې ولایت مرستیال والي مولوي رحیم الله محمود، د سرحدونو قومونو او قبایلو چارو ریاست رئیس مولوي محمد اسحق ادریس هم حضور درلود. لومړی ښاغلي عمري مېلمنو ته ښه راغلاست ووایه ورپسې د سرحدونو، قومونو او قبایلو چارو وزارت سرپرست الحاج ملا نورالله نوري په دې ولایت کې د کوچیانو او ده نشینو د ځینو ستونزو په اړه له ښاغلي عمري سره خبرې وکړې، ښاغلي نوري د دې سفر موخه د يادو منازعاتو د حل په هدف له ښکېلو خواو او ځايي مسؤلينو سره د همغږي رامنځته کول ياد کړل. د یادونې وړ ده چې تر دې وړاندې هم ښاغلي نوري او د منازعاتو د حل کمېسیون دې ولایت ته د شخړو د حل په موخه سفر تر سره کړی و.
