د ننګرهار ولایت په مرکز جلال اباد کې لویه ولسي غونډه جوړه شوه
دوشنبه/۶/شعبان المعظم
د سرحدونو، قومونو او قبايلو چارو وزارت له لورې په ننګرهار ولایت کې د ولسونو او قومونو د یووالي او همغږۍ غونډه جوړه شوه چې پر مهال یې د یاد وزارت سرپرست وزیر الحاج ملا نورالله نوري، د جرګو او قبایلي چارو د همغږۍ معین الحاج ملا عبدالخالق عابد، مل پلاوي په شمول د یاد ولایت والي حاجي محمد نعیم ، د ادارو مسؤلینو، قومي مشرانو او دیني عالمانو هم ګډون درلود.
د غونډې په پیل کې د یاد ولایت والي حاجي محمد نعيم او د سرحدونو قومونو او قبایلو چارو رئيس قاري رحمت الله د وزارت مقام او نورو راغلیو میلمنو ته هرکلی وکړ.
د ناستې په دوام د قومي سپین ږيرو او علماوو په نمایندګي څو تنو ویناوي وکړې او ویې ویل: د قومونو د یووالي په موخه دا ډول غونډې جوړول ډیرې اړینې دي ځکه د قومونو په اتحاد سره د نظام بقا را منځته کیږي دوی په خپلو خبرو کې له حکومت څخه د سرحدي سیمو قومونو ته د استانتیاوو برابرولو غوښتنه وکړه.
وروسته د یاد وزارت د قبایلي چارو معین الحاج ملا عبدالخالق عابد وویل: د تیر اشغال په نتېجه کې مو ولس په سمت، ژبې او قوم پرستۍ ویشل شوی و، چې اوس الحمدلله دا هر څه له منځه تللي او افغانان متحد دي.
د غونډې په پای کې سرپرست وزیر ملا نورالله نوري وینا وکړه او د قومونو تر منځ پر يووالي او د منازعاتو پر هوارولو یې ټينګار وکړ.
نوموړي زياته کړه: دغې خاورې ډیر انقلابونه تجربه کړي دي او د اسلام بیرغ یې تر اوسه هم هسک ساتلی، دا خاوره همدغو ګډو قومونو ساتلې ده او دا ټول مسؤلین د همدې ولس له غیږي څخه را پورته شوي دي نوموړې ټولو راغلیو قومونو ته ډاډ ورکړ چې د دوی ټولو غوښتنو ته رسوونه کیږي او مشورې به یې عملي کیږي. غونډه د هیواد د اتحاد په دوعا پای ته ورسېده
