له يو شمير کارکوونکو سره کتنه
يکشنبه٢٢جمادالثاني١٤٤٤
د سرحدونو، قومونو او قبایلو چارو وزارت د جرگو او قبايلي چارو د همغږۍ معین الحاج ملا عبدالخالق عابد د وزارت اړوند د جرگو او قبايلي چارو د همغږۍ رياست او له ولايتونو سره د اړيکو امريت له یو شمير کارکوونکو سره په خپل کاري دفتر کې وکتل. لومړی الحاج ملا عبدالخالق عابد په خپلو خبرو کې وویل:
دا د شکر ځاي دى چې موږ داسې يو اسلامي نظام لرو چې د اسلامي اصولو په رڼا کې راته د خدمت زمینه برابره ده، نوموړي زياته کړه موږ ټول مسؤليت لرو چې خپل ورځنی کار داسې تر سره کړو چې یو مو خپل راسپارل شوی خدمت په ښه ډول سر ته رسولی وي او دوهم مو د خپل ولس خدمت پر وخت کړی وي. ورپسې ټولو کارکوونکو خپل نظرونه شریک کړل او د خپلو کاري استقامتونو له اړخه یې د ښه او پر وخت وظیفې ډاډ ورکړ، او همدا رنګه یې وخت پر وخت داسې ناستې ګټورې وبللې او د ښه راتلونکي ذریعه یې یاده کړه.
