په فراه ولایت کې کوچیانو ته د (۳۰۲۰) جریبه ځمکې د ویش لړۍ
د (۳۰۲۰) جریبه ځمکې ښارګوټی چې پخوا په فراه ولایت کې د کوچیانو لپاره ځانګړی شوی وو، پرون د همدې ولایت مقام د مسئولینو او د سرحدونو، قومونو او قبایلو چارو د رئیس مولوي تاج الدین منصور او د ولایت مقام په ګډون د پټۍ په پرې کولو سره رسماً پرانیستل شو. د سرحدونو، قومونو او قبایلو چارو رئیس مولوي تاج الدین منصور کوچیانو ته د یادو نمرو د وېشلو پر مهال وویل: د دې ښارګوټي له جوړیدو څخه وروسته به د دې ځای اوسیدونکو ته روغتیايي او ښوونیزې چوپړتیاوې هم برابرې شي، تر څو کوچیان وکولای شي، د لبنیاتو په وړاندې کولو او تولیدولو سره خپل اقتصادي ژوند او څارویو ته وده ورکړي.
د سرحدونو، قومونو او قبایلو چارو د دفتر د بنسټ ډبره د سیمه ییزو چارواکو په ګډون کې کېښودله شوه. په یادو مراسمو کې د ولایت مقام د مسئولینو تر څنګ د ګڼو نورو ادارو مسئولینو، او د کوچیانو ۸۰ شوراګانو د مسؤلينو ګډون کړى وو. باید وویل شي چې په تیر حکومت کې د سرحدونو، قومونو او قبایلو چارو د ریاست ځمکې د یو شمېر زورواکو له خوا نیول شوې وې، خو پرون د یاد ریاست د ځمکو ساحه د ګڼو چارواکو په ګډون کې رسماً په نښه شوه او د رغولو چارې یې پیل شوې.
