د ناوړه دودونو پر خلاف د مبارزې غورځنګ ستونزې واورېدل شوې!
د سرحدونو او قبایلو چارو وزارت د جرګو او قبایلو چارو د همغږۍ معین ښاغلي الحاج محمد یعقوب احمدزي نن له غرمې مخکې د ناوړه دودونو پر خلاف د مبارزې غورځنګ له مشر ښاغلي خان ولي عادل او غړو سره وکتل.
په دې کتنه کې د یاد غورځنګ مشر د خپلو کړنو او فعالیتونو په اړه معلومات وړاندې کړل او د ناوړه دودونو شتون یې د هېوادوالو په زیان وباله وې ویل: چې زموږ ټولنه یوه سنتې ټولنه ده، نو دا چې دا ناوړه دودونه پای ومومي باید بېلابېلې ادارې په دې اړه له موږ سره همکاري وکړي دغه راز یې خپلې یو لړ ستونزې هم د وزارت له مشرتابه سره شریکې کړې او د حل غوښتنه یې وکړه.
ورپسې ښاغلي الحاج محمد یعقوب احمدزي په خپلو خبرو کې د یاد غورځنګ کړنې او فعالیتونه د ستاینې وړ وبلل او د ناوړه دودونو سره د مبارزې په برخه کې یې د دوی سره د خپلو همکاریو ډاډ ورکړ.
دغه راز ښاغلي احمدزي د یاد غورځنګ له مشر څخه وغوښتل، چې د وزارت په بېلابېلو غونډه کې برخه واخلي او له وزارت سره خپلو لیدنو کتنو ته دوام ورکړي.
