د قومي شوراګانو د همغږۍ مرکز د دارلانشاء له غړو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې مخکې د قومي شوراګانو د همغږۍ مرکز د دارالانشاء له غړو سره د خپل کار په دفتر کې وکتل.
په دې کتنه کې راغلو مشرانو د شوراګانو فعالیتونه، ستونزې، غوښتنې، وړاندیزونه او نظریات د وزارت له مشرتابه سره شریک کړل او ټینګار یې وکړ، چې قومي شوراګانو تل د خپل نظام، ملي ګټو، په هېواد کې د سولې او امنیت د ټینګښت د ملي او دفاعي ځواکونو څخه د ملاتړ او تلپاتې اوربند په اړه غږ اوچت کړی او په دې برخو کې به خپلو هڅو ته دوام ورکوي.
نوموړو دغه راز د سرحدونو او قبایلو چارو وزارت له مشرتابه څخه مننه وکړه، چې له قومي شوراګانو سره بشپړه همغږي لري او د دوی غوښتنې او وړاندیزونه په ورین تندي اوري.
ورپسې ښاغلي محب الله صمیم د خپلو خبرو په ترڅ کې د یادو مشرانو او مخورو څخه مننه وکړه او د دوی هېوادنی احساس یې د قدر وړ وباله وې ویل: دا ټولو ته روښانه ده، چې قومي شوراګانو د هېواد په آبادۍ، سوکالۍ او د قومي شخړو په حل او نورو برخو کې فعاله ونډه اخیستې او تل یې د هېواد د ملي ګټو او خاروې ساتنې لپاره نه ستړې کېدونکې هلې ځلې ترسره کړي دي.
ښاغلي صمیم زیاته کړه د سرحدونو او قبایلو چارو وزارت مشرتابه د تل په څېر ستاسو مشرانو په خدمت کې دی او تاسو کولای شئ، چې خپلې ستونزې او غوښتنې له موږ سره شریکې کړئ.
