له پښتونخوا څخه راغلیو ښځینه فعالانو سره کتنه!
د سرحدونو او قبایلو چارو وزیر ښاغلي محب الله صمیم نن سه شنبه د ۱۳۹۹ لمریز کال د کب پر ۹ مه نېټه له پښتونخوا څخه راغلیو ښځینه فعالانو سره د خپل کار په دفتر کې وکتل.
په دې کتنه کې لومړی ښاغلي صمیم دوی ته (د مارچ اتمې) د ښځو نړیوالې ورځې له امله مبارکي وویله: ښځې یې د درناوي او احترام وړ وبللې وې ویل: د سولې او امن په ټینګښت، د کورني ژوند په سمون، د ټولنې په اقتصادي، اجتماعي او فرهنګي چارو کې د ښځو ونډه ډېره ښکاره او د ارزښت وړ ده.
ښځې او نارینه په ګډه کولای شي په ډېره ښه توګه د ژوند پورې تړلې چارې چې یو اړتیا ده پرمخ یوسي او دغه چارې به د یو بل له شتون پرته نیمګړې وي.
دغه راز یې د سولې، امن او ثبات د ټینګښت لپاره د کرښې دواړو غاړو ښځو ترمنځ د اړیکو په پیاوړتیا او ګډو هڅو ټینګار وکړ.
ورپسې له پښتونخوا څخه راغلیو خویندو هم د اړیکو په پراختیا او دغه راز د سولې او امن په ټینګښت کې له نورو خویندو سره څنګ په څنګ د ګډو هڅو ژمنه وکړه، دلته او هلته یې ناخوالې، جګړې، ګواښونه او ستونزې ګډې وبللې او په ګډې مبارزې یې ټینګار وکړ.
