په کابل کې له پښتونخوا او کویټې څخه راغليو سياسي، ولسي او فرهنګي مشرانو او شخصیتونو سره کتنه!
د سرحدونو او قبایلو چارو وزير ښاغلي محب الله صميم نن مازديګر په کابل کې له پښتونخوا او کویټې څخه راغليو سياسي چارواکو، ولسي او فرهنګي شخصيتونو او ښځينه فعالانو سره وکتل.
د کتنې په پيل کې ښاغلي صمیم راغلو مشرانو او مېلمنو ته ښه راغلاست او هرکلی ووايه زياته يې کړه ، خوشاله يم چې زموږ ورونه نن خپل کور ته راغلي او له موږ سره د لوی افغانستان په مرکز کابل کې ويني.
د سرحدونو او قبایلو چارو وزیر د افغان امن او ثبات ملي کنفرانس کې د راغلو مشرانو او شخصیتونو ګډون اغیزمن وباله او هیله یې څرګنده کړه، چې ددغه ملي کنفرانس برخه وال او وینا وال به په افغانستان کې د باعزته سولې او تلپاتې اوربند لپاره خپل غږ اوچت کړي تر څو زموږ په لوی کور کې د جګړو او ناخوالو ټغر ټول او سوله ټينګه شي.
ورپسې راغلو مشرانو د افغانستان له دولت په تېره بيا د سرحدونو او قبایلو چارو له وزارت څخه مننه وکړه، چې نوموړي يې کابل ته رابللي تر څو د امن او ثبات په ملي کنفرانس کې پر ګډون سربېره د لر او بر افغانانو پر روانو ستونزو او حل لارو خبرې وکړې.
