د موجوده نظام په پاېښت کې د قومي او سیاسي مشرانو او ځوانانو هڅې له ارزښته ډکې دي !
دغه څرګندونې د سرحدونو او قبایلو چارو سرپرست او نوماند وزیر ښاغلي محب الله صمیم نن له غرمې مخکې له یو شمېر قومي او سیاسي مشرانو او ځوانانو سره د کتنې په ترڅ کې وکړې.
په دې کتنه کې راغلو مشرانو د خپلو یو لړ سیمه ییزو ستونزو شریکولو ترڅنګ وویل: د ستونزو د حل لپاره باید ټول مېشت درانه قومونه سره یوځای د سولې، ملي یووالي او امنیت د ټینګښت لپاره کار وکړو، ترڅو په هېواد کې د امن فضا رامنځته او د تلپاتې سولې خاوندان شو.
نوموړو همدار راز له موجوده نظام څخه خپل بشپړ ملاتړ څرګند کړ او له سرحدونو او قبایلو چارو وزارت سره یې د دوامدارو همکاریو ډاډ ورکړ.
ورپسې ښاغلي محب الله صمیم د خپلو خبرو په ترڅ کې د راغلو مشرانو ستونزې پر ځای وبللې وې ویل: ستاسو درنو مشرانو له نیکو نظرونو څخه منندوی یم، تاسو تل د خپل هېواد او خلکو لپاره ریښتینې او رغنده هڅې ترسره کړي دي هڅه به مې دا وي، چې ستاسو مشرانو نظرونه او سلامشورې له ځان سره ولرم او د چارو د بهبود په برخه کې ورڅخه ګټه واخلم.
دغه راز ښاغلي محب الله صمیم د موجوده جمهوري نظام د پاېښت په برخه کې د قومي او سیاسي مشرانو او ځوانانو هڅې له ارزښته ډکې یادې کړې او نوموړو ته یې ډاډ ورکړ، چې ستونزې به یې د حل په موخه له اړوندو ادارو سره شریکې کړم.
