په ننګرهار کې د دریو دښمنو کورنیو ترمنځ روغه جوړه وشوه
دوشنبه، ۱۴۴۶/ ۱۳/ذيالقعدې
د ننګرهار ولایت په سرخرود ولسوالۍ کې د دریو کورنیو ترمنځ ۱۰ کلنه شخړه د سرحدونو، قومونو او قبایلو چارو د رئیس الحاج حافظ رحمت غازي عمر، د سیمې د دیني علماوو او قومي مشرانو په منځګړيتوب پای ته ورسېده او ښکېلې کورنۍ د سولې پر ټغر را ټولې شوې.
په دې موخه جوړه شوې غونډه کې ښاغلي عمر او نورو ګډونوالو د درې واړو کورنیو له مشرانو سره جلا، جلا ناستې وکړې، هغوی ته یې د بښنې او ورورولۍ ارزښتونه روښانه کړل او دا یې ورته واضحه کړه چې ستونزې باید د خبرو له لارې حل شي، نه د شخړو او تاوتریخوالي له لاري. د اوږد مهاله هڅو او ناستو په پایله کې ښکېلو خواوو د جرګه کوونکو مشورې ومنلې او دا پرېکړه یې وکړه چې خپلمنځي دښمني ختمه کړي او په ټولنه کې د ورورولۍ په فضاء کې ژوند وکړي.
په پای کې د درې واړو کورنیو مشرانو په خوښۍ سره یو بل ته غاړې ورکړې او یو بل ته یې بښنه وکړه.
