په ننګرهار ولایت کې ١٥ کلنه او بلخ ولایت کې هم دې ته ورته شخړه حل شوه
پنج شنبه ۱۴۴۶/ ۳/ ۹
د ننګرهار ولايت لعل پورې ولسوالۍ ګل ډاک سيمه کې د دوو کورنيو ترمنځ هغه پنځلس ۱۵ کلنه شخړه حل شوه چې له يوه لوري پکې يو کس خپل ژوند له لاسه ورکړی و. د روغې جوړې په دې مراسمو کې چې نيږدې ۸۰۰ کسانو ګډون درلود د ياد ولايت د سرحدونو، قومونو او قبايلو چارو د رئيس رحمت الله غازي عمر په مشرۍ د لعل پورې ولسوال، قومي سپين ږيرو او علماوو په ګډو همکاريو حل شوه او دواړه طرفونه يو بل ته ورغاړې وتل.
ښکېلو لوريو د ا.ا.ا له مشرانو او مسؤلينو مننه وکړه چې د ولسونو اوږدې او ژورې شخړې هواروي، د خير فيصلې کوي او خلک سولې ته رابولي، دوی په خپله تيره د ښمنۍ پښيماني وښوده، يو بل ته يې عفوه وکړه او د ورورۍ په ژوند کولو يې ټينګار وکړ.
په همدې ډول د بلخ ولايت په چمتال ولسوالۍ کې د دوو قومونو ترمنځ منازعه د ياد ولايت د سرحدونو، قومونو او قبايلو چارو د رئيس مولوي سردار محمد محمدي، ځايي سپين ږيرو، ځوانانو، متنفذينو، ديني عالمانو او د نظر خاوندانو په هلو ځلو هواره شوه او دواړه قومونه سولې ته را وګرځېدل.
د سرحدونو، قومونو او قبايلو چارو وزارت د خپلو ولايتي رياستونو په همغږۍ تل هڅه کوي چې د هيواد په هره سيمه کې شخړې، دښمنۍ او وژنې له منځه يوسي او ولسونو ته د ارام، هوسا او سولييز ژوند زمينه برابره کړي.
