په بادغیس ولایت مسؤلینو د دوو کورنیو پخلاینه
پنجشنبه ـ ۱۲/۱/۱۴۴۶
په بادغیس ولایت کې دوه مرور قومونه چې د یوې حقوقي موضوع پر سر یې له کلونو راهیسې اختلافات درلودل، تېره ورځ یې د یوې ناستې پرمهال د ولایتي مسؤلینو او سیمه ییزو مشرانو په هلوځلو پخلاینې ته غاړه کېښوده. دغه شخړه چې د دوو قومونو د کورنیو ترمنځ (۱۱) کاله مخکې د یوه لوري د حقوقو د تلف کېدلو له وجهې پېښه شوې وه، د دواړو ټبرونو ترمنځ یې زیات اختلافات رامنځته کړي و خو د یاد ولایت د سرحدونو، قومونو او قبایلو چارو د ریاست، د شخړو د حل کمیسیون په منځکړیتوب او هڅو یې شخړه حل و فصل شوه. د دغې شخړې د حل په مراسمو کې د مرکچیانو له لوري یاده موضوع پوره مطالعه او وڅېړل شوه او تر څېړنې وروسته یې یوه لوري ته د اوښتي زیان په جبران کولو او د دوی ترمنځ په سوله پرېکړه وکړه. کښل شوې فیصله د طرفینو په حضور کې ابلاغ شوه او دواړو لوریو ته منلو وړ وګرځېده.
