د آمو سیند له تخریباتو څخه لیدنه وشوه
۱۴۴۵/۷/۱۶
د بلخ ولایت د سرحدونو، قومونو او قبایلو چارو رئیس مولوي حبیب الرحمن رحماني د یوه پلاوي په ملتیا د یاد ولایت د کلدار او شورتپه سرحدي ولسوالیو له سرحدي سیمو څخه لیدنه وکړه.
د دغې لیدنې پرمهال یاد پلاوي د ولسوالیو له مسؤلینو سره له همغږي کولو وروسته د دواړو ولسوالیو له مېشتو قومونو سره په بیلابیلو ناستو کې خبرې وکړې. ښاغلي رحماني د ټولو سرحد مېشتو سیمو قومي مشرانو ته اطمینان ورکړ چې د دوی ستونزې به تر لوړ رتبه چارواکو رسوي او د حل لارې به ورته لټوي.
د دغه سفر په جریان کې د آمو سیند له تخریباتو څخه هم څارنه وشوه، چې د یادو دوو ولسوالیو په اوږدو کې له ۶ تر ۱۰ کیلومتره ځمکه تخریب شوې وه چې په نتېجه کې یې د ځایي خلکو کورونو، کرنیزو ځمکو او نورو آبادیو ته زیانونه اړولي وو. د دغې سیمې وګړو له حکومت څخه د آمو سیند د استحکاماتو او زیاتې پاملرنې غوښتنه وکړه.
