د خوست ولایت د سرحدي ولسواليو له یو شمېر کوچي قومي مشرانو سره کتنه
شنبه ٣ دجمادي الثاني١٤٤٥
د سرحدونو، قومونو او قبایلو چارو سرپرست وزیر الحاج ملا نورالله نوري په خپل کاري دفتر کې د خوست ولایت سرحدي ولسواليو له يو شمير کوچي قومي مشرانو سره وکتل.
په پیل کې کوچي مشرانو سرپرست وزیر ته په چارو کې د توفیق غوښتنه وکړه او ویې ويل: تاسو د دې دردمن ولس دوا او د هېواد د سرحدونو په حفاظت کې رغنده رول لوبولی او موږ ټول قومونه درباندې وياړو .
کوچي مشرانو همداراز د خپلو يو لړ ستونزو او غوښتونو د بيانولو په ترڅ کې وويل چې د اسلامي امارت چارواکي دې د خوست ولايت په کوچي مېشتو سرحدي ولسواليو کې د روغتيا، سړک جوړونې او د ښوونې او روزنې په برخه کې کار وکړي.
ورپسې د یاد وزارت سرپرست ښاغلي نوري یادو مشرانو ته ښه راغلاست ووایه زياته يې کړه چې تاسو زړورو قومونو له امارت سره په جهاد کې تر خپلې وسې ونډه اخیستې، د ډيرو ستونزو پر وړاندې مو مبارزه کړې او د اسلامي نظام له مجاهدينو سره په گډه مو خپل هېواد له هر ډول ناخوالو را اوچت کړی. سرپرست وزير د خپلو خبرو په دوام کې د راغلو قومي مشرانو د ستونزو حل خپل مسوليت وباله او ډاډ يې ورکړ چې د دوی د ستونزو او غوښتونو په حل کې به ورسره همکاري کوي.
