لوګر ولایت ته د افغانستان د اسلامي امارت د سرحدونو او قبایلو چارو وزارت د سرپرست محترم ملانورالله نوري او ورسره مل پلاوې سفر !
د افغانستان د اسلامي امارت د سرحدونو او پرقبایلو چارو وزارت سرپرست ښاغلي ملانورالله نوري په داسې حال کې، چې د وزارت د عامه اړیکو او ښوونې او روزنې مسؤل محترم شیخ حضرت ولي حقاني او د اطلاعاتو او نشراتو رئيس هم ورسره مل وو، نن له غرمې مخکې د روان ۱۴۴۳ ه ق کال د صفر المظفر د میاشتې په ۲۷مه نېټه لوګر ولایت ته دخپل رسمي سفر په لومړۍ ورځ په دغه ولایت کې د لوګر د سرحدونو او قبایلو چارو ریاست څخه لیدنه وکړه.
په دې کتنه کې لومړی د یاد ریاست کارکوونکو ښاغلي نوري ته درخپلو کاري کړنو او استقامتونو په اړه لنډ مالومات ورکړل او خپلې یو لړ ستونزې یې د حل په موخه ورسره شریکې کړي.
ورپسې دسرحدونو او قبایلو چارو وزارت سرپرست ښاغلي ملا نورالله نوري کارکوونکو ته ډاډ ورکړ چې دپخوا په شان دې خپلو دندو ته دوام ورکړي، ترڅو په دغه ولایت کې له قومي مشرانو سره دسلا مشورو او جرګو له لارې وزارت خپلو موخو ته ورسیږي.
ښاغلي نوري دغه راز نوموړو ته ډاډ ورکړ، چې ستونزې به یې د وزارت د شته امکاناتو په چوکاټ کې حل کړي. همدارنګه یې کارکوونکي خپلو راتلوونکو دندو او مسؤلیتونو ته ځير کړل .
