د وزارت یو شمېر پوځي افسرانو ته ترفیعګانې منظور شوې!
په هغې غونډه کې، چې نن چهارشنبې د کب میاشتې پر ۲۷ مه نېټه د سرحدونو او قبایلو چارو وزارت د سرحدي څېړنو په معینیت کې جوړه شوې وه، د سرحدي څېړنو معین ښاغلي ډاکټر محمد آصف قاضي زاده، د جرګو او قبایلو چارو د همغږۍ معین ښاغلي الحاج محمد یعقوب احمدزي، یو شمېر رئيسانو او پوځي منسوبینو ګډون درلود.
د غونډې په پیل کې ښاغلي قاضي زاده یادو افسرانو ته د مبارکۍ ویلو ترڅنګ وویل: د کب نهمې د ملي او دفاعي ځواکونو د ورځې په مناسبت مو د سرحدونو او قبایلو چارو وزیر ښاغلي محب الله صمیم ته د پوځي افسرانو د رتبو په اړه وړاندیز وکړ، چې له ښه مرغه منظور شو او له حکم سره سم درې تنو افسرانو هر یو ښاغلی اسمعیل خان له جګړنۍ څخه ډګرمنۍ ته او ښاغلی غفار خان او شاه اغا له تورنۍ څخه جګړنې ته په ترفعیګانو وویاړل شول.
ښاغلي قاضي زاده د خپلو خبرو په ترڅ کې له وزیر صاحب څخه مننه وکړه وې ویل: دا چې دا وطن په موږ باندې حق لري نو باید په صداقت او ژمنتیا سره ورته کار وکړو او خپل مسؤلیت په ښه توګه ترسره کړو.
دغه راز ښاغلي محمد یعقوب احمدزي هم په خپلو خبرو کې نوموړو ته د مبارکۍ ویلو ترڅنګ د یاد معینیت کړنې وستایلې.
د غونډې په پای کې یادو منسوبینو د وزارت له مشرتابه څخه د مننې په ترڅ کې ژمنه وکړه، چې خپله دنده به په پوره صداقت سره پرمخ بیایې او په هر ډول شرایطو کې به خپلو دندو ته ژمن وي.
