د هوتخېلو قومي شورا په پرانيست غونډه کې ګډون!
د سرحدونو او قبايلو چارو وزارت د جرګو او قبايلي چارو د همغږى معين محترم الحاج محمد يعقوب احمدزي نن د هوتخېلو قومي شورا په پرانيست غونډه کې ګډون او وينا وکړه.
په دې، غونډه کې، د هېواد بېلابېلو قومي مشرانو، ديني عالمانو، مخورو، چارواکو، ټولنيزو، فعالانو او ځوانانو برخه اخيستې وه.
ښاغلي احمدزي په خپلو خبرو کې لومړی د سرحدونو او قبایلو چارو وزیر محترم محب الله صميم پيغام او نیکی هیلې د شورا له مشرتابه او د غونډې ګډونوالو سره شريکې کړي زياته يې کړه: په هېواد کې د سولې او ملي يوالي په ټينګښت او نورو برخو کې د قومي شوراګانو رول ارزښتناک دی، نوموړي د ولسونو ترمنځ په يووالي او اتفاق ټينګار وکړ.
نوموړي د خپلو خبرو په دوام د هوتخېلو قوم مېړانې او سرښندونو ته په اشارې سره وويل: موږ او تاسو بايد له خپل موجوده جمهوري نظام او امنيتي او دفاعي ځواکونو څخه د ملاتړ په ترڅ کې د سولې او ملي روغې جوړې لپاره له خپلو قومي ظرفيتونو څخه استفاده وکړو او په دغو حساسو شرايطو کې د يو بل تر څنګ ودريږو تر څو په هېواد کې د جګړې ټغر ټول او تلپاتې سوله ټينګه شي.
ښاغلي احمدزي دغه راز د دغه شورا رامنځته کېدل مهم ګام وباله او د شورا مشرتابه ته يې مبارکي وويله هيله يې څرګنده کړه، چې ياده شورا به له نورو قومي شوراګانو سره په همغږی وکړای شي د ملي موخو په ترلاسه کولو کې رغنده رول ولوبوي.
