ننګرهار ته د سرحدونو او قبایلو چارو وزارت د جرګو او قبايلي چارو د همغږۍ معین سفر!
د سرحدونو او قبایلو چارو وزارت د جرګو او قبایلي چارو د همغږۍ معين ښاغلي الحاج محمد يعقوب احمدزي ننګرهار ولايت ته د خپل سفر په ترڅ کې، چې موخه يې د طورخم پر دروازه د مسافرو د تګ راتګ د ستونزو اورېدل و، د ننګرهار له والي ښاغلي ضيا الحق امرخېل سره تر لېدنې وروسته طورخم ته سفر وکړ.
ښاغلي احمدزي په طورخم کې له کميسار او قومي او قبايلي مشرانو سره يو ځای د مسافرينو ستونزې واورېدې وې ویل: د ولسونو په تېره بيا د مسافرو د تګ راتګ ستونزه، چې بايد دوې ته د تګ راتګ سهولتونه رامنځته شي د وزارت لومړيتوب دی. موږ به د مسافرو ستونزه د حل په موخه له اړوندو ادارو سره شريکه کړو، تر څو دوې ونه ځوريږې او ورته په سفر کې اسانتيا رامنځته شي.
د سرحدونو او قبایلو چارو وزارت د جرګو او قبايلو چارو د همغږۍ معين دغه راز د طورخم مدیریت ساختماني چارې له نږدې وکتلې او مسوولينو ته يې لار ښوونه وکړه، چې خپلې چارې په خپل وخت او ښه توګه ترسره کړي.
