قومي مشران د ملي موخو په تطبیق او ځوانان د خپلو وړتیاوو او ځواک څخه په استفادې سره د هېواد په سمسورتیا او پرمختګ کې ارزښتناک رول لوبولی شي!
دغه څرګندونې د سرحدونو او قبایلو چارو وزیر ښاغلي محب الله صمیم نن له غرمې مخکې له یو شمېر قومي مشرانو او ځوانانو سره د کتنې په ترڅ کې وکړې.
په دې کتنه کې راغلو قومي مشرانو او ځوانانو د خپلو سیمه ییزو ستونزو شریکولو ترڅنګ له موجوده نظام څخه خپل بشپړ ملاتړ څرګند او له وزارت سره یې د هر راز همکاریو ډاډ ورکړ.
ورپسې ښاغلي محب الله صمیم په خپلو خبرو کې په قومي مشرانو او ځوانان غږ وکړ، دا چې ځوانان د یو هېواد د ملا د تیر حیثیت لري نو باید د پوهې په تر لاسه کولو کې خپل روښانه برخلیک وټاکي او د خپل هېواد د جوړولو په اړه فکر وکړي.
همدا راز تاسي درانه مشران د ملي موخو په تطبیق او د قومونو په انسجام او ځوانان د خپلو وړتیاوو او ځواک څخه په استفادې سره د هېواد په سمسورتیا او پرمختګ کې ارزښتناک رول لوبولای شئ.
همدا راز ښاغلي صمیم زیاته کړه: له یووالي او ورورګلوۍ پرته موږ نه د سولې خاوندان کیدای شو او نه د امنیت، باید ټول سره یو ځای د خپل هېواد او خلکو لپاره کار وکړو او سیمه ییزو توپيرونو ته د پای ټکی کېږدو.
