په کندوز کې د دوو کورنیو ترمنځ یو کلنه بدي په دوستي بدله شوه
دوشنبه ۲۴/ جمادي الآخرة/ ۱۴۴۷
د کندوز ولایت د سرحدونو، قومونو او قبایلو چارو ریاست د ولایتي علماء کرامو،متنفذینو او مصلحینو په منځګړیتوب د دوو کورنیو ترمنځ د قتل له وجې یو کال مخکې رامنځته شوې بدي چې دواړه کورنۍ یې په خپلمنځي شخړه کې لاس او ګریوان کړي وو، تېره ورځ د یوې لویي قومي جرګې او مرکې پرمهال په دوستي بدله کړه.
دغه د قتل قضیه چې د کندز ولایت جرخ آب کلي د دوو کورنیو ترمنځ تېرکال پېښه شوې وه، د دواړو لوریو ترمنځ یې اړیکي ترینګلې کړې وې او یو بل پکې له مړه او ژوندي څخه منع وو. د دغې موضوع د حل په موخه کلیوالي مشرانو او سیمه ییزو متنفذینو د یاد ریاست له مسؤلینو سره سلا و مشورې وکړې او د یوه مرکچي هیئت د ستړیاوو او مکررو ناستو په برکت دواړه خواوې روغې جوړې ته راضي شوې.
د یادې موضوع د حل په موخه یوه لویه ولسي غونډه را وبلل شوه، چې پرمهال یې محلي مسؤلینو، قومي مشرانو، ځوانانو او عامو خلګو ګډون کړی وو، په غونډه کې د سرحدونو قومونو او قبایلو چارو رئیس مولوي احمدالله تالقاني د دوه کورنیو ترمنځ د جنجالونو له منځه وړل او روغه جوړه د ټولو مسلمانانو اسلامي او ایماني مسؤلیت وباله او د غچ اخیستني پر ځای یې پر بښنې، اتحاد او ورورولۍ ټینکاروکړ، په وروستیو کې په بدي کې ښکېل لوري راوغوښتل شول او د غېږې په ورکولو سره یې خپلې بدي ته د پای ټکی کېښود
