په ننګرهار، خوست او سرپل ولسوالي کې د ستونزو اورېدو قومي جرګې ترسره شوې
چهارشنبه ۱۰ ربيع الأول ۱۴۴۷
د ننګرهار په دره نور، خوست په نادرشاه کوټ او سرپل په قلعه شهر ولسوالي کې د سرحدونو، قومونو او قبايلو چارو وزارت په لارښوونو د اسلامي اخوت او خلکو د ستونزو اورېدو په موخه محلي مسؤلینو جلاجلا قومي جرګې جوړې کړې، چې په کې د سيمې قومي مشرانو، دیني عالمانو او ځايي خلکو ګډون درلود.
د يادو جوړو شويو غونډو پرمهال د سرحدونو، قومونو او قبایلو چارو رياست مشرانو ولسونو ته په خطاب کې وويل: اسلامي نظام په بې شمېره قربانيو او سرښندنو راغلی، ساتنه، دفاع او ملاتړ يې زموږ د ټولو مسؤليت دی. دوی همداراز د امیرالمؤمنین حفظه الله هغه فرمانونه هم خلکو ته واضيح کړل، چې په خوښېو، ودونو د مړو په تدفین او د حج په مراسمو کې د اضافي لګښتونو د مخنيوي سپارښتنې پکې شوې دي.
په پای کې د سيمې قومي مشرانو په خپلو خبرو کې د اسلامي امارت په بيا واکمنېدو خوښي څرګنده کړه او ياده يې کړه، چې د سر او مال په قيمت به ترې ساتنه کوي. دوی همدارنګه د خپلې سيمې ځيني اړينې ستونزې او وړانديزونه هم له مشرانو سره شريک کړل.
