په غزني ولایت کې یوه لویه او خونړۍ شخړه په ورورګلوي بدله شوه
۱۴۴۵/۳/۳۰
د غزني ولایت په ناور ولسوالۍ کې د احمدزیو کوچیانو او پیرحسین هزاره قومونو تر منځ له یوې نیمې لسیزي راهیسې پېښه شوې بدي او خونړۍ شخړه چې د موسمي څړځایونو پرسر رامنځته شوې وه او له کوچیانو څخه پکې یو تن او له پیر حسین خیلو څخه ۹ تنه وژل شوي او لسګونه نور ټپیان شوي وو، نن ورځ د یوې ناستې په ترڅ کې حل شوه. د دغې شخړې ښکېلو لوریو ته د ځاني زیانونو تر څنګ په میلیونونو افغانیو مالي زیانونه هم اوښتي وو او په یادو سیمو کې یې یو له بل سره په تګ راتګ هم بندیز لګېدلی و.
دغه شخړه د ریاست الوزراء په حکم د سرحدونو، قومونو او قبایلو چارو وزارت په سرپرستۍ د کرني اوبو لګولو او مالداري وزارت، د ملي امنیت ریاست، د کورنیو چارو وزارت او د فرامینو د تعقیب او تطبیق ریاست استازو ته سپارل شوې وه چې د هیئتانو له سفرونو، تحقیقاتو او ناستو وروسته تېره شپه د یوې غونډې په ترڅ کې د ټاکل شوي پلاوي او ښکېلو لوریو په حضور کې حل او په ورورولۍ بدله شوه.
په دغه ناسته کې له طرفینو سره خبرې وشوې او له دواړو څخه د اختیار خط په اخیستلو سره د پلاوي له لوري پرېکړه ونیول شوه او جلسې ته وړاندې شوه چې د دواړو لوریو له خوا په ورین تندي ومنل شوه او یو بل ته غاړه غړۍ شول.
د ناستې پر مهال د سرحدونو، قومونو او قبایلو چارو وزارت د سرحدي پلټنو معین مولوي محمد اسماعیل غزنوي وویل چې د اسلامي امارت د مشرتابه او ریاست الوزراء له لوري دوی ته د شفقت له مخې یاده موضوع د حل په موخه سپارل شوې وه چې وروسته له پوره څېړنې یې نن ورځ د پلاوي په ګډون حل کړه. نوموړي د هیواد ټول قومونه یووالي او ورورګلوي ته راوبلل او په یو بل منلو یې ټېنګار وکړ.
