د شمال زون د سرحدي ستونزو د ارزونې امنيتي کميټې د ازبکستان هېواد له پلاوي سره د همغږۍ ناسته تر سره کړه
سه شنبه ٤ ربيع اولال١٤٤٥
د اسلامي امارت له لوري د هېواد د سرحدي ستونزو د ارزونې او هواري په موخه د شپږمې سرحدي ليوا قومندان مولوي منصور جاويد تر مشري لاندې ټاکل شوي پلاوي چې د سرحدونو، قومونو او قبایلو چارو وزارت نماينده ښاغلي غلام نبي صميم يې هم عضويت درلود ازبکستان هيواد ته د رسني سفر په ترڅ کې د کوربه هيواد له سرحدي چارواکو سره د همغږۍ ناسته تر سره کړه.
په ياده غونډه کې د سرحدونو، قومونو او قبایلو چارو رئیس ښاغلي غلام نبي صمیم د سرحدې ولسواليو د خلکو د شته ستونزو يادونه وکړه او د امو درياب د تخريباتو، په ازبکستان هېواد کې د افغان زندانيانو د خلاصولو، د سرحدي صفري نقطو د تجديد ، د دواړو هېوادونو ترمنځ دتجارتي اموالو په تگ را تگ کې د اسانتياوو د رامنځته کولو او د ښه ګاونډيتوب د دوام په اړه په تفصيل سره خبرې وکړې او په يادو برخو کې يې په گډ کار ټينگار وکړ.
په پاي کې د دواړو هېوادونو پلاوو يو بل ته ډاډ ورکړ چې ستونزې به هواروي دوستانه اړیکې به لا پسې پراخوي او په بېلابېلو برخو کې به له يو بل سره بشپړه همکاري کوي.
