هلمند کي ديني عالمانو او قومي مشرانو د ملي امنيتي ځواکونو له سرښیندنو او مېړانو ستاینه وکړه او د تاوتريخوالي د کمښت هڅه يې د سولې لپاره یو مهم ګام وباله.
د هلمند ګڼو ديني عالمانو، قومي مشرانو او خلکو د يوې لويي غونډې پرمهال، چې د هلمند والي تورنجنرال محمدیاسین خان هم ګډون درلود، د ملي امنیتي ځواکونو د اوونۍ په لړ کې د ملي اردو، پولیسو او ملي امنيت سرتیري د ګلونو په ګېډيو او ملي بېرغونو وستایل او ملاتړ يې څرګند کړ.
د هلمند والي غونډې ته په وینا کي د ملي امنيتي ځواکونو د پیاوړتیا، قربانیو او لاسته راوړنو ستاینه وکړه، او له قومي مشرانو، ديني عالمانواو خلکو څخه يې مننه وکړه، چې هر وخت يې د خپلو سرتېرو څخه ملاتړ کړی، او هغوی يې د دندې د لا ښه اجرا له امله تشویق کړي.
ښاغلي یاسین خان د سولې په برخه کې د مخالفینو لخوا تاوتریخوالي د کمښت له امله خوښي څرګنده کړه، او هیله يې وښوده چې په هېواد کي دایمي سوله برقراره شي.
هلمند والي پر ديني عالمانو، قومي مشرانو او خلکو غږ وکړ، ترڅو د سولي، امنیت او محلي حکومتدارۍ په چارو کې همکاري وکړي، او د جنګ د پای ته رسېدو لپاره هلې ځلې وکړي.
د حج او اوقافو رئيس محمد داؤد مدقق، د سرحدونو او قبایلوچارو رئیس نویدنظري، ديني عالم مولوي عبدالغفار، شیخ احمدي او شیخ محمدیونس موسوي د ملي امنيتي ځواکونو ملاتړ، یوه اسلامي او افغاني وجیبه وبلله، او پر خلکو يې غږ وکړ، چې خپل سالم او لوستي ځوانان د ملي امنيتي ځواکونو لیکو ته ورکړي، د هغوی ملاتړ وکړي، او د قربانيو ستاینه یې وکړی.
قومي مشرانو احمدشاه جمال، حاجي عبدالولي مجاهد، حاجي احمدجان او د ځوانانو په استازیتوب عصمت الله هم د ملي امنيتي او دفاعي ځواکونو له فعالیتونو او لاسته راوړنو ستاینه او ملاتړ وکړ، او دا ځواکونه يې د هېواد د ناموس، عزت او برم ساتونکي وبلل.
وروسته قومي مشرانو، ديني عالمانو او ځوانانو یوځای د ملي اردو، ملي امنيت او ملي پولیسو ګڼو سرتېرو ته دهغوی د مېړاني اوسرښېندنو له امله د ګلونو ګېډی او ملي بیرغونه ورکړل او خپلو دندو ته يې وهڅول.
