ننګرهار کې د ۳۵ کلنې شخړې تر څنګ بلخ کې هم ۲۰ کلنه شخړه هواره شوه
شنبه ۹ محرم الحرام ۱۴۴۷
د ننګرهار ولايت په نازيان ولسوالۍ کې د دووکورنيو ترمنځ شاوخوا ۳۵ کلنه شخړه د ياد ولايت د سرحدونو، قومونو او قبايلو چارو رياست مسؤلينو قومي مشرانو، ديني عالمانو او ځايي خلکو په دوامداره هڅو پای ته ورسېده.
د دغه شخړې د هوارېدو پر مهال له دواړو لوريو دوه تنه وژل شوي وو او د لويو مالي تاوانونو برسېره یې تر منځ يو لړ ژور اختلافات موجود وو، چې مسؤلينو يې ترمنځ د خير فيصله وکړه، دا اوږد مهاله شخړه یې پای ته ورسوله او طرفينو د خوشحالۍ ژوند پيل کړ.
په همدې حال کې د بلخ ولايت مرکز مزار شريف ښار په بابه ياد ګار سيمه کې د دوو کورنيو ترمنځ د ځمکې د ملکيت پر سره راپورته شوې ۲۰ کلنه لانجه د دغه ولايت د سرحدونو، قومونو او قبايلو چارو رياست استازو او قومي سپين ږيرو په هلو ځلو حل او دواړو خواوو د مشرانو له منصفانه فيصلې وروسته د ورورۍ غاړې سره ورکړې.
هممهاله له همدې شخړې تر حل وروسته د ياد ولايت مرکز مزار شريف ښار په نهمه ناحيه کې د دوو قومونو ترمنځ پېښه شوې ۲ کلنه شخړه، چې د کورني تاوتريخوالي له امله يې ښکېل اړخونه له ژور خفګان سره مخ کړي وو حل او دښمني يې په دوستي بدله شوه.
