په تخار ولايت کې مېشت قومونه په اتفاق او ورورولۍ سره ژوند کوي.
۱۴۴۴/۵/۱۰هـ ق يکشنبه
د سرحدونو، قومونو او قبایلو چارو وزارت لوړ رتبه هيئت د تخار ولايت د سرحدونو، قومونو او قبایلو چارو رياست کې د تالقان ښار له يو شمېر متنفذينو سره وکتل.
د وزارت د دفتر رئيس شيخ حضرت ولي حقاني چي د اطلاعاتو او عامه اړيکو رئيس ملا حمدالله فطرت او د قومي چارو سلاکار امين الله پاميري يې هم ملتيا کوله د تخار ولايت مرکز تالقان ښار له قومي مشرانو سره وکتل.
د قومي مشرانو په نمايندګي څو تنو مشرانو خبرې وکړې.
قومي مشر حاجي ملا عبدالله وويل: د قومي مشرانو مسؤليت او رسالت دادی چي د ځوانانو په اصلاح کولو کې رول ولوبوي او ټولنه کې عامه پوهاوی رامنځ ته کړي، ښاغلي مخدوم عبدالعزيز وويل: د خدماتو عرضه کول، خلکو زړونه ګټل او ساتل د حکومت دنده ده، عدالت تامينول امنيت او استقرار تضمينوي.
ښاغلي حاجي پيرګل اغا پيرزاده وويل: قومي متنفذين پخې تجربې او ګټورې مشورې لري بايد حکومت يې له نظرياتو څخه ګټه واخلي، په وينا يې په تخار ولايت کې مېشت ټول قومونه په اتفاق او ورورولۍ کې ژوند کوي.
ورپسې د وزارت د دفتر رئيس شيخ حضرت ولي حقاني راغلو مشرانو ته ښه راغلاست ووايه او مننه يې وکړه چې خپل ګټور نظريات، مشورې او وړانديزونه يې ورسره شريک کړل، ښاغلي حقاني وويل: اسلامي امارت د قوم، ژبې او سمت پر اساس ويشونو ته قايل نه دی، قوم يوازي د پيژندلو وسيله ده، اسلامي نظام د خلکو غوښتنو ته رسېدنه خپله دنده بولي او متوازن انکشاف ته ژمن دی، په وينا يې قومونه دي چي انقلابونه تر بريا پورې رسوي او همدا قومونه دي چې حکومتونه تشکيلوي.
په پاي کې د سرحدونو، قومونو او قبایلو چارو وزارت د اطلاعاتو اوعامه اړيکو رئيس ښاغلي فطرت د مشرانو له تجربو، نيکو مشورو او وړانديزونو څخه مننه وکړه او زياته يې کړه چې مشران کولاي شي چي د ټولنې د اصلاح لپاره اغېزمن کار وکړي او په دې برخه کې له خپل رسوخ او نفوذ څخه استفاده وکړي او د ناوړه دودونو مخه ونيسي.
د همغږۍ دا ناسته د افغانانو تر منځ د يووالي او اتحاد په دعا پاي ته ورسېده.
