د لوی کندهار د ځوانانو سرتاسري شورا له مشر او غړو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې مخکې په خپل کاري دفتر کې د لوی کندهار د ځوانانو سرتاسري شورا د دارالانشاء مسٶل ښاغلي رحيم الله حنيفي او غړو سره وکتل.
په دې کتنه کې یو شمېر ځوانانو د یادې شورا د ټولنیزو فعالیتونه په اړه د وزارت مشرتابه ته معلومات وړاندې کړل وې ویل: چې تل مو د خپلې شورا له لارې د موجوده نظام او امنیتي او دفاعي ځواکونو بشپړ ملاتړ کړی او په دې اړه مو لویې ولسي غونډې هم جوړې کړي دي دوی دغه راز د لوی کندهار ولسونو یو شمېر ستونزې او وړاندیزونه د وزارت له مشرتابه سره د حل په موخه شریک کړل وې ویل: چې زموږ ځوانان دې د وزارت اړوند لېسو کې جذب شي، تر څو په ښه او مناسب چاپیریال کې خپلې زده کړي ترسره کړي نوموړو د زون په کچه د وزارت په چوکاټ کې ځوانانو ته یوې لېسې د جوړولو غوښتنه وکړه او له وزارت سره یې په بېلابېلو برخو کې د خپلو همکاریو ډاډ ورکړ.
ورپسې ښاغلي محب الله صمیم په خپلو خبرو کې د راغلو ځوانانو څخه مننه وکړه، چې تل یې د موجوده نظام او جمهوریت څخه ملاتړ کړی، وې ویل: موږ باید د خپل نظام تر چتر لاندې هېواد ته کار وکړو او دا زموږ د ټولو ګد مسوولیت دی. ستاسو د وړاندیزونه پر بنسټ به په هلمند ولایت کې یوه لېسه جوړه کړو، تر څو ځوانان يه مناسب چاپیریال کې زده کړې وکړي او په راتلونکي کې خپل هېواد ته په ویاړ سره کار وکړي.
دغه راز پاتې ستونزې او وړاندیزونه به مو د حل په موخه له اړوندو ادارو سره شریکې کړو.
