په ننګرهار کې د دوو کورنیو تر منځ ۲۷ کلنه شخړه هواره شوه
شنبه ۱۲/ جمادی الاولی/ ۱۴۴۸
د ننګرهار ولایت د سرحدونو، قومونو او قبایلو چارو ریاست مسؤلینو او سیمه ییزو قومي مخورو په ګډه د دغه ولایت په هسکه مینه ولسوالۍ کې د دوو کورنیو تر منځ هغه ۲۷ کلنه شخړه د جرګې له لارې هواره کړه، چې له امله یې یو تن وژل شوی و.
جرګه کوونکو د موضوع له بشپړې څېړنې او د دواړو لورو له څرګندونو وروسته، د شرعي اصولو او قومي دودونو په رڼا کې د شخړې د هواري لپاره لازمې خبرې او هڅې وکړې، د یادې شخړه د حل په موخه یې پریکړه اعلان کړه او له دواړو کورنیو وغوښتل، چې د رامنځته شوي جوړجاړي درناوی وکړي، تېرې ستونزې هېرې او له یو بل سره د متقابل درناوي پر بنسټ خپل ژوند ته دوام ورکړي.
په پای کې دواړو کورنیو د جرګه کوونکو له هڅو مننه وکړه او ژمنه یې وکړه، چې له دې وروسته به د یو بل پر وړاندې له هر ډول شخړې او ستونزې ډډه کوي او د جوړجاړي پر بنسټ به خپل ژوند ته دوام ورکوي.
