په بادغیس ولایت کې ولسي غونډه جوړه شوه
شنبه، ۶ ربيع الأول ۱۴۴۷
د بادغیس ولایت په دره بوم ولسوالۍ کې د اسلامي اخوت او د خلکو د ستونزو د اورېدو په موخه د یاد ولایت د سرحدونو، قومونو او قبایلو چارو ریاست د مسؤلینو په مشرۍ یوه لویه ولسي غونډه جوړه شوه، چې پکې قومي مشرانو، دیني عالمانو او ځايي خلکو ګډون درلود.
یاده غونډه د قرآن کریم د څو مبارکو آیتونو په تلاوت پیل شوه. ورپسې د سرحدونو، قومونو او قبایلو چارو رئیس الحاج مولوي محمد قاسم ضمیر وویل چې موږ ټول باید له اسلامي نظام سره هر اړخیزې همکارۍ ته دوام ورکړو او هغه کړنې چې ټولنه زیانمنوي، له منځه یوسو. نوموړي همدا راز د امیرالمؤمنین حفظه الله تعالی هغه فرمان یاد کړ چې په ښادیو، د مړو او د حج په مراسمو کې د اضافي لګښتونو مخه نیسي.
په پای کې راغلیو قومي مشرانو په خبرو کې وویل: چې له حاکم اسلامي نظام سره به اوږه په اوږه درېږي، دوی همداراز د برښنا، سړکونو، پاکو اوبو او کلینیکونو د جوړېدو په برخه کې خپلې اړتیاوې شریکې کړې.
