د سرحدونو، قومونو او قبايلو چارو وزارت مسؤلينو په هرات کې ۶ کلنه شخړه هواره کړه
يکشنبه ۱۶ صفرالمظفر ۱۴۴۷
د ياد وزارت لخوا يوه پلاوي چې پکې د دعوت ارشاد رئيس مفتي شفيع الله ثاقب، د تفتيش رئيس شيخ حضرت ولي حقاني او د مقام د شخړو د حل سلاکار محمد اجان رهبر شامل وو هرات ولايت ته د خپل سفر په ترڅ کې د دوو کورنيو تر منځ ۶ کلنه دښمني په دوستي بدله کړه.
دغه شخړه، چې د اسحاقزو په سيمه کې رامنځ ته شوې وه او له امله يې يو کس وژل شوی و، د سرحدونو، قومونو او قبايلو چارو وزارت ياد پلاوي د ځايي علماوو او قومي سپين ږيرو په ملتيا د يوې غونډې له لارې حل او د مقتول کورنۍ مقابل لوري ته بښنه وکړه.
د يادې جوړې شوې غونډې پر مهال مسؤلينو قومونه يووالي او ورورولي ته را وبلل او له هغوی يې وغوښتل، چې د هرې لويې او وړې ستونزې پر مهال د اسلامي امارت مشرانو سره موضوع شريکه کړي تر څو د بدو عواقبو مخه يې ونيول شي.
