پنجشېر ولایت کې د اسلامي نظام د ثبات، ولسي یووالي او انسجام ستره غونډه
چهارشنبه ـ ۱۱/۱/۱۴۴۶
په پنجشېر ولایت کې د یوې سترې غونډې پر مهال قومي سپین ږیرو د اسلامي امارت په پایداري او ثبات خوښي څرګنده کړه ویې ویل چې ټول ولس د دې نظام ملاتړی دی او هیچا ته اجازه نه ورکوي چې دا نظام وننګوي. دوی په قومي یووالي ټینګار وکړ او اسلامي حکومتولي یې د ولس د ستونزو حل لاره وبلله. دا څرګندونې په یاد ولایت کې د سرحدونو، قومونو او قبایلو چارو وزارت له لوري د اسلامي نظام د ثبات، ولسي یووالي او انسجام د یوې سترې ولسي غونډې په ترڅ کې ترسره شوې، چې پر مهال یې د قومي سپین ږیرو، ولایتي مسؤلینو او والي په شمول د یاد وزارت لوړ رتبه مسؤلینو هم حضور درلود. د وزارت د جرګو او قبایلو چارو د همغږۍ مرستیال مولوي محمد علي جان احمد په خپلو خبرو کې قوم او قبیله د پېژندګلوي وسیله وبلله او د ولس ستونزو ته د اسلامي امارت له ژمنتیا څخه یې ډاډ څرګند کړ. نوموړي د غربي استعمار پر مهال د افغانانو ترمنځ اچول شوې تفرقې او دسیسې شنډې یادې کړې او هیوادوال یې د یووالي په ټغر کښېناستلو ته راوبلل. د جرګو او قبایلو چارو د همغږۍ رئیس شیخ حضرت ولي حقاني د اسلامي نظام اقامه او د هیواد خپلواکي د افغانانو د ستړیاوو پایله یاده کړه او د ولسونو ترمنځ په لا ښې همغږۍ یې ټینګار وکړ. د پنجشېر والي الحاج محمد اغا حکیم د خپلو خبرو په جریان کې تېر شوي مسؤلین ولس ته په ازموینه کې ناکام وګڼل او په قومي مخورو یې غږ وکړ چې ځوانان دي د هیواد خدمت ته راوبولي.
