له ازبکستان هیواد سره د دوستانه اړیکو پیاوړتیا
۱۶/۱۲/۱۴۴۴
د سرحدونو، قومونو او قبایلو چارو وزارت له لوري د شمال زون د سرحدي ارزونې په موخه ټاکل شوې پلاوي د یوه رسمي سفر په ترڅ کې د ازبکستان هیواد له استازو سره وکتل. په دغه کتنه کې د جوزجان ولایت د سرحدونو، قومونو او قبایلو چارو رئیس مولوي غلام نبي صمیم، د یاد ولایت د شپږمې سرحدي لیوا قومندان مولوي منصور جاوید او د ازبکستان هیواد استازو ګډون کړی وو. په لیدنه کې د یاد پلاوي په مشرۍ د همدغه ولایت د سرحدونو، قومونو او قبایلو رئیس ښاغلي صمیم د سرحدي ټکو او سرحد مېشتو خلکو د ستونزو په اړه مفصلې خبرې وکړې او د یادو ستونزو د هواري ژمنه یې وکړه. نوموړي د خپلو خبرو په جریان کې د ازبکستان هیواد استازو ته ډاډ ورکړ چې د افغانستان له لوري به هیڅ ډول سرحدي ستونزې دوی ته نه پېښېږي. هغه له یاد پلاوي څخه غوښتنه وکړه چې له افغانستان سره دي ښو اړیکو ته ادامه ورکړي تر څو د دواړو هیوادونو تر منځ همداسي دوستانه اړیکې لا پیاوړې شي.
