په غور ولایت کې د شخړو د حل له کمیسیون څخه د خلکو خوښي
چهارشنبه/۲۵/ذالقعدةالحرام/۱۴۴۴
د غور ولایت د سرحدونو، قومونو او قبایلو چارو امریت ته د ۱۴۰۲ یم هـ ل کال له پیل را په دې خوا د قومي شخړو، غلا، قتل او ځمکو د غصب اړوند د ۳۴ بېلابیلو قضیو عریضې تسلیم شوې وې چې له مجموعې یې د یاد ولایت مقام له لورې ټاکل شوي پلاوي د دغه ولایت د دولینې ولسوالۍ د مومیني قوم د ځمکو او نورې قضیې حل و فصل کړې.
یاد پلاوي د غور د ولایت مقام په مشري د یادې ولسوالۍ د ځمکو او نورو قضیو په اړه له بشپړو څېړنو، سفرونو او پوښتنو وروسته ټولې قضیې د شخړو د حل له کمیسیون سره په ګډه وڅېړلې او په اړه یې فیصلې وکړې.
د غور ولایت د سرحدونو، قومونو او قبایلو چارو د امریت په رهبرۍ ښکېل اړخونه د غور ولایت مقام ته راوبلل شوو او د هغوی د قضیو اړوند نیول شوې پرېکړې ورته د دغه ولایت د والي ملا احمد شاه دین دوست په حضور کې واورول شوې.
د یادو پرېکړو له اورېدلو وروسته د ټولو راغلیو قومي مشرانو او ولسي خلکو په استازیتوب څو تنو په خپلو خبرو کې د دوی په اړه له نیول شویو پرېکړو څخه خوښي وښوده او ویې ویل: د مومیني ولسوالۍ او اړوندو سیمو خلک د اسلامي امارت او په خاصه توګه د سرحدونو، قومونو او قبایلو چارو امریت له ستړیاوو او هڅو څخه ډېر منندوی دي چې د خلکو ترمنځ د ورورولۍ او سولې په راوستلو کې کار کوي. دوی یادو مسؤلینو ته په نورو چارو کې د توفیق غوښتنه وکړه او غونډه په دوعا سره پای ته ورسېده.
