په دیني او عصري زده کړو د نویو ځوانانو سمبالول په اصل کې د اسلامي نظام د بقاء لپاره کار کول دي. مسلکي معين ښاغلى مولوي احمد طه قادري.
پنچشنبه ١٢ ذوالقعدة الحرام ١٤٤٤
د سرحدونو، قومونو او قبایلو چارو وزارت مسلکي معین مولوي احمد طه قادري د ياد وزارت له اړوندو ریاستونو سره د لېدنو کتنو په لړ کې نن د ښوونې او روزنې له رئیس او کارکونکو سره وکتل.
په یاده کتنه کې د ښوونې او روزنې رئیس مولوي عبدالرحمن رحماني، د وزارت اړوند د درې ګونو لېسو آمرینو او نورو کارکوونکو په مرکز او ولایتونو کې د تعلیمي مرکزونو د تدریسي ودانیو او د لیلیې د امکاناتو او اړتیاوو د څرنګوالي په اړه معلومات وړاندې کړل.
دوی په مرکز او ولایتونو کې له تعلیمي مرکزونو څخه څارنه، زده کوونکو ته د څښاک د پاکو اوبو برابرولو، هغوی ته د کانکور چمتوالي پروګرامونو، ښوونکو ته د ظرفیت لوړونې په منظور د سیمینارونو او ورکشاپونو جوړول، په لېسو کې د روغتیایي کلینکونو مجهزول او د ولایتي لېسو د برېښنایي ستونزو د ترمیماتي چارو په اړه وړاندیزونه شریک کړل.
ورپسې مسلکي معین ښاغلي قادري د خپلو مسؤلیتونو په ترسره کېدو ټینګار وکړ او ویې ویل: لکه څرنګه چې خلفاء راشدینو د اسلامي خلافتونو د بقاء او استمرار لپاره خپل مسؤلیتونه په صداقت تر سره کول موږ هم باید د اسلامي نظام د بقاء او پایښت لپاره خپل مسؤلیتونه هېر نه کړو او ښه په غور یې تر سره کړو، خپل ځوانان په دیني او عصري زده کړو سمبال کړو تر څو په یوه سپېڅلې روحیه د هېواد او ولس د خدمت جوګه شي.
نوموړي زياته کړه چې یادې غوښتنې به د وزارت له مشرتابه سره د حل په موخه شریکې کړې او په دې برخه کې یې د هڅو ژمنه وکړه.
