په هرات ولایت کې د دوو قومونو تر منځ شخړه حل شوه
شنبه/۱۶/ شوال المکرم/ ۱۴۴۴
د هرات ولایت د کشک رباط سنګي ولسوالۍ اړوند د چغوک او تیمور قومونو تر منځ د څړځایونو پر سر شخړه د یاد ولایت د سرحدونو، قومونو او قبایلو چارو ریاست په منځګړیتوب حل شوه.
دغه شخړه چې له څو کلونو را په دېخوا یې ادامه لرله او پر سر یې د دواړو قومونو تر منځ لویي جګړې را منځته شوې وې د هرات ولایت مقام لخوا د یوه ټاکل شوي هیئت له لوري په سوله بدله شوه.
د یادو قومونو تر منځ د اختلاف د حل په وخت کې د سرحدونو، قومونو او قبایلو چارو رئیس مولوي جمال الدین عمري، د یادې ولسوالۍ ولسوال مولوي نوراحمد شهاب، د تورغونډي سرحدي پولي مسؤلینو، قومي مشرانو او علماوو حضور درلود.
په پیل کې ټاکل شوي هیئت د دواړو لوریو څخه استازي وټاکل په موضوع یې خبرې وکړې، د څړځایونو تر لیدلو وروسته دواړو لوریو څخه اختیار خطونه واخستل شول. تر دقیقي څېړنې او ارزونې وروسته پرې اخیري پرېکړه ونیول شوه، پایله یې د شخړې دواړو لوریو ته واورول شوه او دواړو اړخونو پرې توافق وکړ.
ناسته په دوعا ویلو سره پای ته ورسېده.
