په ارزګان ولایت کې د سرحدونو، قومونو او قبایلو چارو وزارت له لوري لویه قومي جرګه جوړه شوه
شنبه د رجب المرجب/ ۶/ ۱۴۴۴
د سرحدونو قومونو او قبایلو چارو وزارت د جرګو معینیت لخوا په ارزګان ولایت کې له قومونو سره د اتحاد غونډه ترسره شوه، په یاده غونډه کې د جرګو معین الحاج ملا عبدالخالق عابد، مل پلاوي، د ارزګان والي الحاج مولوي علي جان احمد، د ادارو رئیسانو، د ولسوالیو او مرکز علماء کرامو، قومي مخورو او سلګونه عامو خلکو ګډون کړی و.
ټولو قومي مخورو او علماء کرامو په خپلو خبرو کې له ا.ا.ا څخه د ملاتړ ژمنه وکړه او د خپلو سیمو د لارو جوړیدلو، روغتیا، او تعلیم د پرمختګ غوښتنه یې وکړه. د وزارت د پلان او پالیسۍ رئیس مولوي نیک محمد افغاني د نظام او د قومونو تر منځ پر یووالي، همغږي، نرمي او شفقت خبرې وکړې.
د غونډې په اخیر کې د وزارت د جرګو معین الحاج ملا عبدالخالق عابد غونډې ته وویل: دلته چې د نړۍ زبرځواک وپرځېد دا همدغه ولس همکاري وه، د دې ولس قربانۍ پر دې نظام ورکې نه دي، د دې هېواد هر وګړی باید د دې نظام شکر اداء کړي، همدا راز یې د قومونو د اتفاق په تړاو وویل(( راځئ چې، له سیمه ییز، ژبنيو، قومي او سمتي تعصبونو څخه تېر شو او د دې واحد نظام تر قیادت لاندې په اتفاق او یو والي کې هوسا او آرام ژوند وکړو.
