په زابل کې ولسي غونډه تر سره شوه.
۱۴۴۴/۲/۸ دوشنبه
د سرحدونو، قومونو او قبایلو چارو سرپرست وزير الحاج ملا نورالله (نوري) زابل ولايت ته د سفر په ترڅ کې د شاه جوی ولسوالۍ هولان رباط عالي ليسه کې ددې سېمې علماوو، قومي مخورو، د ليسې ښوونکو او زده کونکو ته په جوړه شوې غونډه کې وينا وکړه.
ښاغلي (نوري) راغلو خلکو ته په خبرو کې وويل: اسلامي امارت د هيواد په کچه متوازنې تعليمي، اقتصادي، صنعتي او زراعتي ودې او پراختيا ته ژمن دی او غواړي په مساوي توګه ټولو ليري پرتو سيمو ته هم د خدماتو د عرضه کولو لړۍ پراخه کړي.
نوموړي زياته کړه: د هيواد او اسلامي نظام پايښت په ملي يووالي ، اتحاد او د امارت په هر اړخيز ملاتړ سره شونی دی.
غونډې ته د سرحدونو، قومونو او قبایلو چارو وزارت د دعوت او ارشاد رئيس مولوي شفيع الله ثاقب صاحب هم د علم پر ارزښت او د ماشومانو د اسلامي تربيت پر اړتيا وينا وکړه.
ځايي خلکو ددوئ سيمې ته د اسلامي امارت د مشرانو راتګ او د دوئ له حال څخه پوښتنه کول د وياړ او افتخار وړ وبلل او مننه يې وکړه.
