د غزني ولایت له پخوانیو ولسوالانو او مخورو سره کتنه!
د سرحدونو او قبایلو چارو وزیر ښاغلي محب الله صمیم د غزني ولایت له پخوانیو ولسوالانو او مخورو سره د روان کال د غویي پر۹ نېټه د خپل کار په دفتر کې وکتل.
په یاده کتنه کې درنو ولسوالانو او مخورو د اختر په بختوروشپو ورځو کې غزني ولایت ته د ښاغلي محب الله صمیم د سفر په اړه خبرې وکړې وې ویل: په دې حساسو شرایطو کې غزني ته ستاسو سفر د خلکو د روحیې په پیاوړي کولو دغه راز له نظام او ملي، امنیتي - دفاعي ځواکونو سره د غزني ولسونو د همکارۍ او ملاتړ په برخه کې ډېر ګټور و. د دا ډول جرګو، له ولس سره د لېدنو ، کتنو د لړۍ په دوامدار ساتلو یې ټینګار وکړ.
ښاغلي صمیم وویل: موږ خپله دنده او مسولیت بولو، چې له خپلو درنو خلکو سره د هېواد د ملي مسایلو، د دوی د ستونزو د حل او اړیکو د پراختیا اوانسجام لپاره یې غونډې او جرګې ولرو، تر څو وکولای شو یو د بل په همکارۍ له تاوتریخوالي څخه د پاکې هوسا ټولنې پر لور ګامونه واخلو او له خپل نظام او ملي امنیتي ـ دفاعي ځواکونوڅخه ملاتړ وکړو.
