د وزارت اړوند لېسو د تدریسي، اداري او لیلیه چارو څخه لېدنه !
د سرحدونو او قبایلو چارو وزارت مسلکي معین ښاغلي ډاکتر فریدون بارکزي په داسې حال کې، چې د اطلاعاتو او عامه اړېکو رئیس ښاغلي عبدالوحید خاورې ، د داخلي تفتیش رئیس ښاغلي نثار احمد ذهب احمدي، د تحقیق او مطالعاتو رئيس ښاغلي جاوید احمد وفا، د ښوونې او روزنې ریاست وارسي کوونکي ښاغلي جمال الدین زاهد، د مالي او حسابي ریاست سرپرست ښاغلي حمید الله بارکزي او د رحمان بابا لېسې امر ښاغلي معصومي یې ملتیا کوله نن شنبه د ۱۳۹۸ لمریز کال د تلې پر۷ نېټه د وزارت اړوند خوشحال خان او رحمان بابا لېسو د تدریسي ، اداري او لیلیه چارو څخه له نږدې لیدنه وکړه.
ښاغلی بارکزي او ورسره پلاوي له یادو لېسو څخه د کتنې پر مهال له زده کوونکو څخه د تدریسي چارو د څرنګوالي په اړه پوښتنې وکړې. او په دې اړه یې د هغوی غوښتنې واورېدې.
همدا راز یې په پخلنځي کې هم د ورځنۍ تابلو سره سم د خوراکي توکیو د شتون، د خوړو د کیفیت ، او د لیلیې په برخه کې د پاکوالي او نظافت څخه کتنه او د اړتیاو د پوره کولو په اړه یې مسولینو ته سپارښتنه وکړه.
ورپسې یې د لیسې له مسوولینو او استادانو سره د دغو لېسو په ټولو چارو کې د مثبتو بدلونو دراوستلو په اړه خبرې درلودلې. نظرونه یې سره تبادله کړل. وې ویل: باید د وزارت د اړوند لېسو زده کوونکي ، چې له ناامنه او سرحدي سیمو څخه راغلي او دلته په زده کړه بوخت دي باید د زده کړې له هر ډول اسانتیاوو څخه برخمن اوسي. او دغه اسانتیاوی به موږ ټول د خپل مسوولیت په چوکاټ کې په ګډه رامنځته کوو.اصلاحات به راولو هغه اصلاحات ، چې هغه د تدریسي ، اداري او لیلیه چارو په منظم والي او سمون کې مرسته وکړي.
دغه راز یې له اړوند رئیسانو غوښتنه دا وه ، چې په پرله پسې توګه له اړوند لېسو څخه لېدنه وکړي او د لېسو له مسولینو سره د ستونزو او نیمګړتیاوو په حل کې مرسته وکړي. د یادولو وړ ده، چې وزارت په دې وروستیو کې پخپلو اړوند لیسو کې مثبتو اصلاحاتو راوستلو ته ژمن دی او په همدې پار په پرله پسې توګه مشرتابه پلاوي د پلان مطابق په لېسو کې د روانو چارو بهیر له نږدې ګوري او د لا بهبود په اړه یې مسولینو ته سپارښتنې کوي او خپلې ژمنې د نورو اصلاحاتو دراوستلو په برخه کې تازه کوي.
