برېښنا د اوسنۍ نړۍ مهمه اړتیا ده
یکشنبه/۱۵/ذوالقعدةالحرام/۱۴۴۴
د سرحدونو، قومونو او قبایلو چارو وزارت د غونډو په تالار کې د یاد وزارت اداري ودانۍ ته د برېښنا د سستم او برېښنایي مزیو د راوستلو په موخه ناسته وشوه.
په دغه ناسته کې د وزارت مسلکي معین مولوي احمد طه قادري، د جرګو او قبایلي چارو معین ملا عبدالخالق عابد، د وزارت مالي او اداري لوی رئیس مولوي محمد انور تائب، د وزارت نورو رئیسانو، کارکوونکو او د انارزمین ساختماني شرکت مسؤلینو ګډون کړی وو.
په پیل کې د وزارت د اطلاعاتو او عامه اړیکو رئیس ملا حمدالله فطرت د غونډې اجنډا او د یادې ناستې موخه څرګنده کړه او د برېښنا په ارزښت یې خبرې وکړې.
وروسته مسلکي معین ښاغلي قادري د برېښنا شرکت مسؤلینو او نورو ګډونوالو ته ښه راغلاست ووایه او برېښنا یې د اوسني عصر یوه لویه اړتیا وبلله. هغه همدا راز وویل: انسانانو ته خدای پاک (ج) ډېر نعمتونه ورکړي دي چې شکرانه یې پر موږ ټولو لازمه ده، برېښنا د ټولو ادارتو یوه مهمه اړتیا ده او د نشتون په صورت کې یې ټول کارکوونکې له ستونزو سره مخ کیږي او په کارونو کې خنډ او ځنډ منځ ته راځي.
نوموړي د وزارت له کارکوونکو څخه غوښتنه وکړه چې د برېښنا په مصرف کې احتیاط وکړي او خپل کارونه پر وخت سرته ورسوي.
ورپسې د مالي او اداري چارو لوی رئیس ښاغلي تائب غوندې ته وویل: د وزارت مقام د پخوانۍ برېښنا ستونزو له امله په کارونو کې ځنډ منځ ته راته، د کیفیت او کمیت له امله یې موږ له ستونزو سره مخ کړي وو.
هغه وویل: د وزارت مقام د پرېکړې پر اساس مو د وزارت اداري ودانۍ ته د برېښنا نوې مزي راوستل. نوموړي په دې برخه کې د انارزمین ساختماني شرکت مسؤلین، د وزارت د خدماتو آمر ملا عبدالدیان دیان او د ساتنې او خوندیتوب مدیر محمد حسن نیازی د ستاینلیکونو په ورکولو سره تقدیر کړل او د هغوی د چټک کار ستاینه یې وکړه.
په اخیر کې یاد مراسم د پتۍ په پرېکولو سره پای ته ورسېدل.
